PRESS HANDOUT

(23 of 2024) (2nd May, 2024)

May ni 2, 2024 (Ningani) khan Excise & Narcotics Minister, Pu Lalnghinglova Hmar hovin Central YMA Office Bearers te leh Excise & Narcotics Department chuan Zu leh ruihhlo dona kawnga hmalak dun dan tur sawihovin meeting an nei.

He Meeting-ah hian Pu Lalnghinglova Hmar chuan "Mizoramin zu leh ruihhlo vangin a tuar nasa tawh hle a, hemi do tur hian Excise & Narcotics Department leh Mizorama pawl lian ber, Central YMA chuan hma kan lak dun zel a pawimawh a, Chutianga thawhhonaah chuan hmun hrang hrang atanga zu leh ruihhlo rawn lut tur dan thu-ah te, a dapchhuahna chungchangah te thawkho zelin, YMA bakah, sawrkara department dang te, kohhran hruaitute pawh thawhpui zel an la ni ang"a ti.

Pu Z. Lalhmangaiha, Commissioner, Excise & Narcotics Department chuan "Tun hnaia Burma ram buai vanga ral tlante avangin Phunchang leh a chhehvela zu siama pun belh bakah, Aizawl hmun hrang hranga Hotel leh Restaurant thenkhata ualau taka zu chelek thin an awm nia sawi pawh enzui a ni ang. Zu leh ruihhlo dona kawngah chuan Central YMA emaw pawl hrang hrang dangte chu Excise & Narcotics departmentin a thawhpui zel thei," tiin a sawi.

Pu Lalhmachhuana, President central YMA pawhin, "Zu leh ruihhlo hluar zel hi mipuiin "Ngaia an neih"mai a hlauhawm. Chuvangin hetianga khawsate hian "Hlauh an neih" a tul. Chuvangin zu leh ruihhlo laka fihlimna tur thu leh khuahkhirhna thu hi a tam thei ang ber mipuite hriatah puanzar a ngai a ni"a ti.

            He Ruihhlo dona chungchanga inkawmkhawmnaah hian Pu Peter Zohmingthanga, Joint Commissioner of Excise & Narcotics leh Pu H.F. Lalrinpuia, Secretary Kumpuan Committee & CEC Member, CYMA chuan report an pe a, Pu Lalramsanga Sailo, Secretary to Govt. of Mizoram, Excise & Narcotics chuan lawmthu a sawi a ni.

 

Dated: Aizawl

2nd May, 2024

 

                                                                                                               Sd/-

                                                                                        PETER ZOHMINGTHANGA

                                                                                          Public Relations Officer, 

                                                                          Commissionerate of Excise & Narcotics, 

                                                                                           Aizawl, Mizoram.