Ni 29th May, 2024 - Aizawl : Vawiin, ni 29th May, 2024 (Wednesday) khan Pu Lalduhoma, Hon'ble Chief Minister, Mizoram chuan Excise & Narcotics Department officials te a kawm a. Mizorama Zu leh drugs dona kawnga hmalak zel dan tur leh hmachhawpte chipchiar takin a sawipui. Chief Minister-in hun remchang tha tak a lo siamsak avangin Excise & Narcotics Department hotute pawh an lawm hle a ni..
Chief Minister Pu Lalduhoma hi Pi R. Lalrodingi, Additional Director, Commerce & Industries Department, Officer on Special duty (OSD) to Chief Minister ni bawk leh Pu Vanlaldina Fanai, ICAS, Commissioner & Secretary to Chief Minister with Addl. charge of GAD & Planning te'n an tawiawm a. Excise & Narcotics Department atang hian Pu Lalramsanga Sailo, IRS, Secretary to the Govt. of Mizoram te, Pu Z. Lalhmangaiha, Commissioner of Excise & Narcotics leh Pu Peter Zohmingthanga, Joint Commissioner of Excise & Narcotics (Enforcement) leh Official dangte an tel a. MSeGS atangin Pu Isaac Zothanpuia'n Excise official te hi a tawiawm bawk.
He meeting-ah hian Excise & Narcotics Department in zu leh ruihhlo an do dan te leh an hmachhawp hrang hrangte an sawi a. Hetih rual hian hmasawnna tur kawng hrang hrangte leh harsatna an tawh te, mamawh an neih te pawh Chief Minister hnenah hian an thlen bawk. Chief Minister pawhin tha taka lo dawngsawngin, a theih ang anga Department tana hmalak a tum thu a lo hrilh. He inkawmhonaah hian Excise & Narcotics leh MSeGS tangkawpin an siam, zu leh ruihhlo kaihhnawih dan bawhchhiate chhinchhiahna tur web portal siam tur chungchangte pawh sawiho a ni.
Chief Minister chuan ruihhlo titlem tura hmalakna lam (supply reduction)-ah Excise & Narcotics Department tan la zual tura fuihin, an mawhphurhna a dah a ni thu a hrilh a. Ruihhlo dona kawnga an mamawhte pawh ngaihtuah a tul dawn thu a sawi bawk.
Chief Minister chuan Excise & Narcotics Department-in Project an duante chu Planning Board kaltlang zela thehluh tura hrilh in lo enzui a ni ang, a ti.
Excise & Narcotics Commissioner Pu Z Lalhmangaiha chuan Chief Minister kan neih tawhte zinga an office tlawhtu hmasa ber a nih avanga an lawm hle tih CM hi hrilhin, 'Kan hmalakna tur atana thu min chah te pawh kan hre reng a, kan inpuahchah nasa em em a ni,' a ti bawk.
Chief Minister leh Excise & Narcotics Department hotute hi darkar 2 chuang inkawmin hun tha takin an hmang a ni.
