He Dan hi Zu siam, kawl, phurh, lakluh, thawnchhuah, hralh, lei leh in khap nan leh khuahkhirh nan leh zu atanga excise duty lak nan leh a chung a kaihhnawih thil te atan siam a ni.
He dan hnuaia licence, permit leh pass nei lo chuan zu phurhkual, thawnchhuah, lakluh leh kawl phal a ni lova, lei leh hralh, siam, hman leh kawl leh in khap a ni. Siamchhuahna hmun din phal a ni lo bawk.
Vantlang hmuna zu in leh zu ruih khap a ni.(He danin Vantlang hmun a tih te chu mipui vantlang zin veivahna, hotel, dawr emaw eng hmun dang pawh mipui vantlang tana ruahman emaw kaltheihna kawngpui sir leh vantlang kawng leh step te a huam a ni). Zu vanga buaina siam leh zu in hnua motor khalh khap a ni.
Zu lei thei tur chuan permit neih a ngai a, permit nei te’n he dan leh hrai hnuaia khap leh kaihhruaina te a bawhchhia a nih chuan lung in tan leh permit cancel theih a ni ang.
Zu in leh in lo fiahna atan Breathalyser hman theih a ni ang. Hemi hman a nih hi chuan khawi hmunah pawh Excise & Narcotics / Police officer te’n zu in leh in lo an fiah vek thei ang a, lirthei khalhtute pawh awlsam taka thubuai siamsak theih an ni ang.
Excise & Narcotics / Police duty te thu awih lova lo tibuai leh tan lo khawh te chu kum thum thlenga tantir theih an ni a, He dan bawhchhiate lo tanpuitu chu hrem theih a ni bawk.
Dan lo anga zu lak luh, thawn chhuah, tawlh leh siam kawltu chu hrem theih an ni a. He dan hnuaia thiam loh chantir tawh te’n dan an bawhchhiat leh chuan a hremna hmasa leta hrem theih a ni a.
He Dan hnuaia thiam loh chantir te hremna chu tihnep emaw, chawlhtir emaw tihtawi sak theih a ni lo.
Village/Local Council leh VDP te’n information an pe tur a ni.
Mimal leh mimal pawlhote’n he dan hnuaia dan bawhchhia te an man thei ang.
Inneitute’n an in leh lo a dan bawhchhiatna a awm chuan Excise & Narcotics/Police hnenah an hriattir tur a ni.
He dan hnuaia offence te hi warrant tellova man nghal theih (cognizable) leh non-bailable an ni.
He dan hi kan hman hun chuan hetiang hian ram leh hnamhim nan leh that zawkna atan kalpui a ni ang:
1) Zu dawr atanga lei thei tur hian kum 21 chin chung lampang chauhin phalna (permit) an nei thei anga, zu lei tura permit neih kher a tul kan tihna chu a in tu ten an duh zat zat an lei lohna atan control a tul nia hriat vang a ni a. Tin, naupang kum tlinglo pumraw lian pui pui tena an va lei ve ngawt pawh kha hetianga kan tih hi chuan a khap thei dawn a ni. Zu lei leh in phalna hi nei mahsela tumah vantlang hmunah zu in phal a ni lo anga, rui chunga bengchheng ninawm leh mi dang tana hnawksaka awm phal a ni chuang lo ang. Chutianga kawhmawh bawlte chu mana thubuai rip tak siam sak an ni anga, convict an nih chuan a tlem berah thlakhat lung in tanga hrem theih an ni anga, pawisa pawh Rs. 1000/- (cheng sangkhat) aia tlemlo chawitir an ni ang. An zu lei leh in phalna permit pawh cancel sak an ni ang.
A chunga kan sawi zu rui man convict te hi jail tang leh pawisa chawi kher lo pawhin Magistrate te chuan heng vantlang hna te hi thawk turin thu a pe thei bawk ang- Public hmun, bazar hmun, vantlang zunram thiarna, hospital compound, court compound, vantlang tui luan kawr tihfai leh nau hnuchham in leh tar chawmna te a tanpui tur tein. Heng hna an thawhte hi Excise & Narcotics emaw Police officer ten an veng anga, an hnathawh report chu a thupetu magistrate hnenah kimchang takin report an pe leh ang.
2) Mizoram ah lirthei khalhtute zu ruih vanga accident vangin nunna tamtak kumtin chan a ni a. MLPC Act leh Rule hnuaiah hian Breathalyser hman a ni anga, Police leh Excise & Narcotics Officer ten lirthei khalhtute zu an in leh in loh, Doctor hnena hruaikher ngai lovin, a hmunah an fiah thei tawh anga. Chumi fiahna nen chuan zu in te chu thubuai siamsak nghal an ni anga. Magistrate hnena thubuai thlenlo pawhin Driving License pe chhuak theitu DTO hnenah chung driver te chu thawn an ni anga, a tul dan a zirin driving license cancel emaw suspend theih an ni ang. Hetianga strict taka Police leh Excise & Narcotics Officer ten hma an lak hi chuan lirthei chetsualna pawh a tlem phah sawt beisei a ni.
3) Bonded warehouse tena zu an lakluh turah pawh a tha chauh an lakluh theih nan uluk taka thlan tum a ni a, zu quality tha chauh lakluh a nih chuan zu in mite hriselna pawhin a tawrhloh beisei a ni a, rei tak zu pawh la in lo natna hrang hrangin a tlakbuak te pawh hi a ziaawm theih beisei a ni. Tin, tun dinhmunah chuan zu dawr atangte hian zu lei theihna permit neite chauhin an lei thei anga. Permit card hi District Excise & Narcotics office atanga tea pek chhuah a ni anga, card neitu ten thla khatah a senchi um puitling paruk chiah an lei thei anga, beer leh wine chu um 10 (sawm) ve ve. Permit neilo te chuan an lei ve thei dawnlo a ni.
4) Zu dawr neituten an dawr tinah DRINKING OF LIQUOR IS INJUROUS TO HEALTH (Zu in hi hriselna atan a hlauhawm) tih leh NOT FOR SALE TO PERSONS BELOW 21YEARS (Kum 21 hnuai lam pang hnenah a hralh theihloh) tihte ualau takin an dawrah an tar anga. Zu dah khawlna (Bonded warehouse) leh dawr neitute hian CCTV (close circuit television) anmahni dawrtute leh an hnathawhna te cover vek thei turin an dah ngei bawk tur ani. Hei hian an thiltih an lo record anga, Excise & Narcotics officer ten an ennawn leh vek thei ang. Hei hian dan kalha an thiltih tur a ven beisei a ni.
5) Zu, wine, beer bottle chhin tinah Excise & Narcotics Department Hologram bel vek tur a ni a. Bel lo chu zawrh phal a ni lo.Hei hian zu tha lo leh excise duty pek loh zu te a hriat hran tir thei a ni.
6) Zu hralh chhuah reng reng chu polythene/bag langtlang thei loa fun vek tur a ni a. Mipui hmuh theiha zu bottle ken lan vu vu khap a ni a. Tin, a zuartute’n langtlang thei lova polythene-a an pe lo a nih chuan hrem theih an ni.
7) Zu zawrh reng reng chu mipui hmuh theih tura pawnlam/kawngpui atanga lang theia dah lan tuar phal a ni lo.
8) Zu fakmawina lam ziak emaw thu emaw a tihchhuah/puanzar phal a ni lo.
MLTP Act kum 17 zet kan hman hnuin duhthu a sam tawk lohna leh a hlawhtlin lohna lai te sawi thin a ni a. State Prohibition Council in Study Group te siamin mi rintlak tak takin Research te an bei a. MLTP Act hmang zel lova, a aia dan tha hman a tul zia thu sorkarah an recommend a. Sorkar in uluk taka ngaihtuahin MLPC Act leh Rules hi a lo siam chhuak ta a. Hemi hlawhtling taka kengkawh tur hian mi tupawh mawhphurhna neiin kan pawimawh a.He Dan hi hlawhtling taka hman a lo niha kan society hmel timawitu a lo nih theihna turin mi zawng zawng theihtawp chhuah turin sorkar chuan a ngen tak meuh a ni.
___________________________________________________________
Issued by:
The Commissionerate of Excise & Narcotics, Aizawl, Mizoram.
