PRESS HANDOUT
(13 of 2024) (22nd February, 2024)
Dt. 19th February, 2024-a Vellore kal turte ken tur thil thawn tur zinga ruihhlo (Heroin) a awm thu Social Media-a darh chungchanga Excise & Narcotics Department hmalakna hetiang hi a ni e:
18th February, 2024 (Pathianni) zan dar 8:00 khan Anti-Narcotic Squad, Excise & Narcotics Department-a duty, Sub-Inspector chuan Pu C. Laldinsanga, Chhinga Veng hnen atangin report a dawng a. Pu C. Laldinsanga hian a tuk ni 19.2.2024 (Monday) ah Vellore-ah a kal tur thu leh Vellore-a awm mek te thil chah an thawn tur a ken thlak sak tur chu a rinhlelh avanga a endik thu leh chu thil chu heroin a lo ni reng tih a hriat rualin Excise & Narcotics duty te hriattirin a man tir duh thu a thlen a.
Chu report chu bawhzuiin Excise & Narcotics Sub-Inspector chuan Pu C. Laldinsanga in chu pan nghalin Heroin thawn an tum chu a man a, NDPS Act '85 tlawhchhanin case register nghal a ni.
He thubuai hi chhuiin Excise & Narcotics Department officer te chuan heroin thawn tumtu phone number atangin Social Media (facebook leh Instagram) lama a account zawn chhuah nghal a ni a. Pawi khawihtu hi Lalrohlua (30) S/o Vanramchhuanga, Durtlang Leitan Ramthar a ni tih hriat chhuah a ni a, amah pawh hi 21st February, 2024 zan khan man a ni tawh. 22nd February, 2024 (Ningani) khan court- ah thawn nghal a ni.
Tunlaiin hetianga ruihhlo inthawn chungchangah hian fimkhur a ngai hle. Hre lova heng ruihhlo kawltu nih hi dana buaina nasa tak tawh theihna leh inchinfel harsa tak a nih avangin thil inthawn/inkensak thuah mi tin fimkhur lehzual theuh turin Excise & Narcotics Department chuan mipuite a hriattir a ni.
Dated : Aizawl
22nd February, 2024
Sd/-
PETER ZOHMINGTHANGA
Public Relations Officer,
Commissionerate of Excise & Narcotics,
Aizawl, Mizoram.
