Minister Pu R. Lalzirliana hoin New Year Tea Party 2014 hman a ni

            Commissionerate of Excise & Narcotics, Aizawl te chuan ni 6.1.2014 khan 13th New Year Tea Party, an office Conference Hall-ah an hmang a. Tea Party hi Pu C. Lalngaihthanga, Dy. Commissioner of Excise & Narcotics chuan a kaihruai a. Kum 2013 chhunga thawktu boral te sunna hun neih a ni a. He sunna hun hi Pu Ngurchungnunga Sailo, Dy. Commissioner of Excise & Narcotics chuan a kaihruai bawk. He huna thusawitu Pu Lalhmunsanga, Commissioner of Excise & Narcotics chuan he New Year Tea Party hi a vawi 13 na a nih thu a sawi a. Excise & Narcotics Department te chuan Krismas leh Kumthar laiin hah takin hna an thawk a, in tihthawvenna leh infuihtharna hun tha an buatsaih sak a ni tih a sawi a. Thawktu tam lo mahse, thawktu management kawngah Department in tan a la nasa a, Excise & Narcotics Department chu man-power management tha ber a nia a hriat thu a sawi a. Department mamawh hrang hrang a sawi a, post ruak tam tak chu hnawhkhah ni thei se, a duh thu a sawi a. Superintendent of Excise & Narcotics, Aizawl tan mimal building luah hawh a la ni a, Anni tan hian Department building neih theih ngei ni se, a duh thu a sawi bawk.

            He hun hi Pu R. Lalzirliana, Hon’ble Minister, Excise & Narcotics chuan a hmanpui a. He hun hmanpuitu Minister chuan Excise & Narcotics Department-a hnathawktute chibai a buk a. Kawng tinrenga Pathian ring a hmalam pan zel turin a fuih a. Thawktu tam lo mahse, an inpekna hlu tak vangin hlawhtlinna tam tak an hmu thei tih a hrilh a.

            Minister chuan The Mizoram Liquor Total Prohibition (MLTP) Act hman mek chu, politics-ah beihna tam tak tawk dawn mahse huaisen taka kalpui a ngaih thu a sawi. MLTP Act kengkawh turin Excise, Mizoram Police leh NGO ten theihtawp chhuah mahse, an hnathawh te a langsar lo a, mahse a hlawhtlin nana an thawh te chu a hlut thu a sawi.

            “Tuna kan dan hman mek hi ennawn a ngai dawn a. Rang takin, khauh taka kengkawh chungin 'total' lai hi tihbo a ngai a ni,” Pu R. Lalzirliana hian a ti a. Zu khap burna (Total) hi hlip mah ila,  zu inna hmun (bar) siam erawh tun dinhmunah chuan la tih chi a nih loh thu a sawi bawk.

            Sual dona kawngah huaisen a pawimawh thu sawiin minister chuan, thil tha nia an hriat chu huaisen taka thawk zel turin thawktute chu a hrilh a. Dodaltu an awm pawhin, amah chu an hnungah a ding zel dawn tih sawiin, thil tha lo an tih erawh chuan chhan a tum loh thu a sawi.

            Home minister ni bawk R Lalzirliana hian, misual ten tunhnaia mi pathum an rukbo chungchang a sawi bawk a. A rubotu misualte hian sawrkar chu hun an pe tur a ni lo tih sawiin, "Sawrkar ang chuan cheng khat pawh kan pe dawn lo a, heng ho vauzam mai chi kan ni lo," a ti. Rukbote chunga thil pawi a thleng a nih chuan a tul a nih chuan police tha chakna hmanga beihlet pawh sawrkar chuan a hreh loh tur thu leh an dam chhunga nuamsa a an awm loh tur thu a sawi bawk.

            Excise & Narcotics thawktute inhmuhkhawm hi Parliamentary Secretary Lt. Col. ZS Zuala, MLA leh Pu HL Rochungnunga, Secretary to the Govt. of Mizoram, Excise & Narcotics te pawhin an telpui a ni.

            New Year Tea party 2014 hi nilenga hun hman a ni.

This website belongs to Excise & Narcotics Department, Government of Mizoram, India. Hosted by DoICT, Template by ZENICS | Template by ZENICS

Click to start chatting.